رحلتي من الـ Rejected للـ Accepted

 فتحت الـ Mail Box بتاعك ولقيت الجملة السعيدة (Congratulations you are invited to an interview at the company's Headquarters) خلينا نقولك مبروك وتعالى نعرفك ازاي تحضر لـ Interview، لأن اللي بيخلي الـ Interview ناجح بيحصل أغلب قبل الـ Interview، وكمان هانساعدك تجاوب أغلب الأسئلة بشكل محترف وتفهم هدف الـ employer منهم.

إعمل Research بشكل أعمق

واحدة من الأخطاء الكتير اللي الناس بتقع فيها هي انهم يركزوا الـ Research على إما مستوي كبير زي الشركة والمجال اللي بيقدموا فيه أو على مستوى صغير زي انهم يركزوا الـ Research على الـ Job Description والـ Interviewer، على الرغم من إن الـ Research عشان يكون كويس لازم يتم على المستويين دول وأي مستوى بينهم، فلازم تتأكد إن ألـ Research بتاعك وصلك لمعلومات أساسية عن الشركة والمجال اللي الشركة بتشتغل فيه، الـ Job description واخيرا الـ Interviewer.

حاول دائما انك تبدأ بحثك على المستوى الكبير وهو الشركة، إبداء بالـ Website بتاع الشركة وركز جدا على الـ Mission Statement وازاي تقدر تربطها بمهاراتك وخبراتك السابقة،وازاي تقدر تستخدمهم في تحسين الخدمات اللي الشركة بتقدمها لعملائها ومين هم أهم عملاء الشركة؟ مثلا وانت بتعمل الـ Research لقيت ان من أهداف الشركة انهم يكونوا الشركة الرائدة في المجال بتاعهم فا ممكن تستخدم الهدف دا في انك تجاوب على سؤال ليه انت عايز تشتغل هنا؟ ومهم جدا انك تحاول تكتشف المشاريع الحالية اللي الشركة شغالة عليها، وتقدر تضيف ايه للمشاريع دي.

شوف الناس بتقول ايه عليهم؟ لو حد عمل معاهم Interview وكتب عنه دا هايكون إضافة كبيرة ليك وها يساعدك تتوقع الأسئلة اللي ممكن تتسئلها، وهنا ممكن تستعيد بـ LinkedIn أو حتى Google.

واحدة من أهم الخطوات التحضيرية لأي Interview هي انك تاخد وقتك وانت بتحلل إعلان الوظيفة وتحاول تفهم إيه هي صفات الموظف اللي الشركة بتدور عليه ودا هايبان أكتر في الـ Job description، وأسال نفسك سؤال مهم جدا، ازاي الصفات دي تنطبق عليا؟ لأن بشكل أو بآخر لازم تجاوب على السؤال ده فى الـ Interview.

 شوف الـ Requirements، وفكر في الأسئلة اللي ممكن الـ Interviewer ممكن يسألهالك، حاول تحط نفسك في مكانة، إيه الأسئلة اللي ممكن تسألها وإيه الـ Skills اللي لازم تكون متوافرة فيهم؟ ومن خلال إجابتك للسؤال دا حاول تفكر في موقف من خبراتك السابقة تكون استخدمت فيه المهارات دي وتقدر تثبت من خلاله انك عندك الـ skills دي.

حاول تكتشف مين الـ Interviewer بتاعك، الـ Email اللي فيه الـ Invitation ممكن يكون فيه اسمه او ممكن يكون معمول ليه CC في الـ Email او لو مش موجود فمن حقك انك تسأل الـ Recruiter عن اسم الشخص اللي هايعملك الـ Interview، وبمجرد ما تعرف اسمه ابدا اعمل عنه Research عنه على LinkedIn مثلا، شوف أوجة التشابة اللي بينكم وحاول تذكرها في الـ Interview او انك تـ Break the Ice في الوقت اللي قبل الـ Interview ما يبدأ، دا هيساعدك جدا انك تطور من مستوى التعارف والتواصل الإنساني بينكم، الشئ اللي هيكون إيجابي دا بالنسبة ليك.

جاوب أغلب الأسئلة الشائعة قبل الـ Interview

الأسئلة المتوقعة قبل أي Interview كتير جدا ومن الصعب انك تقدر تحضرهم كلهم ولكن حاول طبقا للـ job Description والـ Research تتوقع الأسئلة اللي ممكن تتسئل ليك، واحنا في الجزء دا من المقال هنحاول نجاوب على أكتر 5 اسئلة ممكن تتسئلهم في أغلب الـ Interviews وايه الإجابة اللي لـ Interviewer متوقعها منك.

عرفني بنفسك

السؤال دا واحد من أهم الأسئلة اللي ممكن تتسئلها في أي Interview وفي الغالب بيكون أول واحد فيهم، فكر في السؤال دا على إنه فرصة الـ Recruiter بيديها لك عشان تقدر تبدا بأقوى شكل ممكن في أول 3 دقائق من الـ Interview وعشان دا اهم سؤال تقريبا فا احنا هنساعدك بـ 3 نصائح تقدر تستخدمهم في الإجابة على السؤال ده:

1- استخدم الـ SHE Formula اتأكد من إن إجابتك Succinct, Honest, Engaging مختصرة، صادقة، وشيقة، ماتقولش نفس الكلام المكتوب في الـ CV لأن في الغالب هو عارف فيه ايه، ممكن تحاول إجابة السؤال على السؤال في شكل قصة، ومن خلالها قدم دليل على الـ Skills اللي الـ Interviewer محتاج إنها تكون متوافرة فيك ودا الي ياخدنا لرقم 2.

2- استخدم الـ Job Description، دا هو قت انك تتكلم عن الـ Skills اللي مطلوبه فيه واللي انت لقيتها في الـ Research، عايزين Good Communicator؟ Problem Solver؟ Creative Mind؟ استخدم القصة اللي هتحكيها في انك تثبت انك تمتلك الـ Skills دي.

3- Showcase Your Strength، بمعنى آخر استعرض مهاراتك بدون المبالغة فيهم وحاول تجمع بين انك بتحكي عن شخصيتك وانك بتثبت الـ Skills اللي عندك.

ليه قدمت على المنصب دا؟

الهدف من السؤال ده هو تحديد مدى شغفك للوظيفة دي، وهو دا اللي عايز الـ Interview يسمعه في الأول والاخر إنتاجيتك معتمدة على مدى شغفك و سعادتك بالوظيفة اللي انت فيها، وخلينا نقولك ازاي تجاوب سؤال زي ده.

لما يكون حد بيتكلم عن حاجة هو شغوف بيها بيقدر يوصل الشعور ده للناس حواليه، وكل ما تقدر توصل الشعور دا للـ Interviewer بيكون دا علامة إيجابية لصالحك، لما تتسئل السؤال دا خلي إجابتك تتضمن حاجتين:

1- ايه اللي يحفزك تقدم على المنصب دا بالتحديد؟

2- ليه اختارت الشركة دي بالتحديد؟

وتقدر تجاوب على الأسئلة دي من خلال استغلال معرفتك عن الشركة والـ Mission والـ Vision الخاصين بيها.

إديني مثال على….

النوع دا من الأسئلة بيكون اسمه Behavioral-based question والهدف منه أن الـ Interviewer يكون عنده فكرة عن مدى خبرتك في التعامل مع مواقف معينة وازاي اتصرفت فيها.

نصيحتنا هنا هي انك تتبع STAR method، وهي اختصار لـ Situation, Task, Action, Result، الطريقة دي هتساعدك انك تحكي قصة مختصرة وواضحة و To the point.

ليه نختارك أنت للوظيفة دي؟

السؤال نقدر نقول عليه Loaded question لأن وراه سؤال تاني وهو ازاي تقدر تقنع الـ Interviewer بنفسك من غير ما تبان مغرور، متلهف على الوظيفة؟

والحل هنا هو انك تبعد عن المبالغات، ماتقولش "أنا أفضل واحد يعمل الوظيفة دي في الدنيا" ولكن فكر في ايه اللي يخليك مناسب في الوظيفة دي مثلا قول "انا الشخص المناسب للوظيفة دي بسبب … " وابداء عد الخبرات والـ Skills اللي تخليك انسب واحد للوظيفة دي وازاي تقدر تستخدم المهارات دي في انك تساعدهم في حل المشاكل اللي بتواجهم بناءا على الـ Research اللي عملته.

شايف نفسك فين بعد 5 سنين

زي ما هو واضح من السؤال الهدف منه هو تقييم مدى طموحك وخاصة لو انت في الـ Entry-Level، الـ Interviewer عارف ان انت مش عايز تكون في نفس المستوى، ولكن تجنب الإجابات الـ Cliche زي "هاكون مكانك" أو " هاكون المدير" في طرق دبلوماسية أكتر من كدا، فكر ايه الخطوة المنطقية لواحد في نفسك وظيفتك ممكن يكون وصلها، حتى لو مش متاح في الشركة اللي بتقدم فيها، على سبيل المثال لو بتقدم على منصب هتكون فيه Junior قول "بعد 5 سنين أحب أكون Senior واكون ساعدت شركتي في تحقيق …." وعدد من الاهداف اللي ممكن تساعد الشركة في تحقيقها.

5 أسئلة لازم تسألهم

في أخر 10 دقائق في الـ Interview ممكن الـ Interviewer يديك الفرصة في إنك تسألهم لو عندك أسئلة مهتم تعرف إجابتها، و نصيحتنا هنا هي انك تستغل الفرصة دي لأنها هتساعدك تظهر مهاراتك وثقتك في نفسك واهتمامك بالوظيفة اللي انت مقدم عليها، والأهم من دا كله هل الوظيفة فعلا مناسبة ليك أو لا؟

الأغلب بيكون معندوش فكرة عن ايه الاسئلة اللى ممكن يسألها ولكن خلينا نساعدك في ايه الاسئلة اللى ممكن تسألها، وايه الهدف منها ولكن خلينا نقسمهم أسئلة عن الوظيفة، عن الشركة، عنك شخصيا!

1- ليه محتاجين حد في الوظيفة دي؟

السؤال دا هيساعدك تعرف ايه اللى الـ HR مخبيه عليك، ممكن الموظف اللي قبلك مشى بعد فترة صغيرة من الشغل ودا غالبا مش علامة كويسة او نقدر نقول Red Flag، ممكن يكون الموظف اللي قبلك اترقي ودي علامة كويسة ان ممكن يكون ليك مستقبل مع الشركة.

2- ايه الفرق اللي ممكن أعمله في أول 3 شهور؟

لما تسأل عن التأثير المباشر اللي تقدر تعمله مع الشركة فانت بتدي إشارة إيجابية للـ Interviewer انك مهتم وممكن فعلا تعمل فرق وبيأكد انك عندك توقعات تشبه توقعاته.

3- ايه اللي يخلينا نقول على موظف هنا انه موظف ناجح؟

كل شركة ليها طريقتها في تنفيذ الشغل، ولما تسأل على صفات الموظف الناجح هايدي انطباع انك عايز تنجح معاهم وكمان هاخلي الـ Interviewer يتكلم معاك بشكل Friendly أكتر ويشارك معاك Insights اكتر عن الشركة.

4- إيه اللي انت اتعلمته من الشركة؟

السؤال دا هيساعدك تتعلم أكتر عن الشركة وازاي ممكن تأثر فيك وفي مستقبلك المهني، لو كان كلامه إيجابي دا يعتبر علامة كويسة وكمان انت خليته يتكلم عن نفسه ودورك هنا انك تسمع عشان تكسب تعاطفه وصداقته.

5- بناءا على الـ Interview ايه الـ Feedback اللي قيمتني على أساسها؟

السؤال دا هيساعدك تعرف رأيهم عنك ايه كا مرشح للوظيفة دي، وعن استعدادك وتقبلك للـ Feedback والـ criticism.

 أعمل Mock Interview

الـ Interview التجريبي هيساعدك تحط كل مهاراتك والحاجات اللي اتعلمتها من المقال دا تحت التجربة، وده هيساعدك تحس انك مستعد ومحضر صح لانه هيديك فرصة تجرب إجاباتك و ردود أفعالك وازاي تحسن منها، واحسن حد يعملك Mock Interview هو حد عنده خبرة في مجالك او Career Coach، بس دا مش شرط أي حد ممكن يكون الـ Mock Interviewer بتاعك طالما هو معاك قائمة بالأسئلة اللي ممكن يسألها لك، ويفضل انك كمان تصوره فيديو عشان تقدر تراجعه بعدين وتستخرج منه أخطائك.

Bonus Tips

1- راقب الـ Body Language بتاعتك، حاول تخلي جسمك يعبر عن ثقتك بنفسك، حرك ايديك في حدود محيط جسمك بشكل بسيط، خلي ابتسامتك Genuine مش مصطنعة، واخيرا خد نفسك وانت بتتكلم بشكل طبيعي.

2- لو في سؤال ماتوقعتهوش قول "دا سؤال مهم، انا محتاج دقيقة أفكر فيه" عشان تعطي انطباع انك بتحسب كلامك وكمان تجاوب بأكتر طريقة صحيحة.

3- شوف موظفين الشركة بيلبسوا ازاي خلال يوم الشغل العادي والبس درجة أعلي منهم، مثلا بيلبسوا Semi Formal يفضل انك تلبس Formal أو تسأل الـ Recruiter لو فى Dress code معين.

4- حاول تخليك على الموعد ويفضل لو الـ Interview في الشركة تحضر قبلها بربع ساعة

5- لو الـ Interview هايكون Online ويفضل انك تختبر الـ Laptop Camera والـ Mice البرنامج اللي هيتم الـ Interview من خلاله على الأقل قبلها بيوم.

6- حاول تاخد معاك الـ Materials اللي هتحتاجها عشان الـ Interview يكون سلس، ممكن يتضمن انك تاخد معاك الـ CV مطبوع، قلم و Notebook عشان لو احتاجت تسجل ملاحظاتك.

وأخيرا خلينا نقول إن ثقتك بنفسك والانطباعات اللي انت هتوصلها عنك هي اللي فعلا هايكون العامل الحاسم في انك تنجح أو لا الـ Hiring Manager غالبا ما يعرفكش والـ Interview هو فرصتك عشان تثير إعجابه و تقنعه انك الأنسب للوظيفة دي وعشان كدا خليانا نفكرك بأهم النصائح في المقال دا:

1- اعمل الـ Research بتاعك على كل المستويات، الشركة، الوظيفة اللي مقدم عليه وأخيرا الـ Interviewer.

2- حضر الأسئلة المتوقع إنها تتوجه ليك.

3- حضر الأسئلة اللي انت محتاج تعرف إجابتها وخليها Professional، إما عن الشركة أو عن الوظيفة أو عنك.

4-عمل Mock Interview، عشان تقدر تحدد أخطائك وتتعلم منها.

5- التزم بالمواعيد والـ Dress Code.

6- حضر الـ Laptop اللي هاتعمل منه الـ Interview والـ Materials اللي هاتحتاجها قبلها بيوم على الأقل.